उर्लाबारी नगरपालिका वडा नम्बर ५ निवासी खामबहादुर याखाले किरात याखा छुम्मा उर्लाबारी नगर समितिलाई नि:शुल्क रूपमा २ कठ्ठा जग्गा दान गरेका छन्। उक्त जग्गा उर्लाबारी वडा जम्बर ६ को कार्यालय छेउमा रहेको निर्माणाधीन कबड्डी हलसँगै दक्षिणपट्टी रहेको छ ।

बजार मूल्य अनुसार सो जग्गाको मूल्य करिब २४ लाख रुपैयाँ बराबरको रहेको छ। नगर समितिका अध्यक्ष प्रेम याखाकाअनुसार उक्त जग्गामा चाँडै किरात याखा छुम्माको कार्यालय भवन र सङ्ग्रहालय निर्माण गरिनेछ। यस्तै उनले सो भवनमा याखा समुदायको कला, साहित्य र संस्कृतिको संरक्षण गरिने जानकारी दिए।

त्यस्तैगरी दानदाता खामबहादुरद्वारा दान गरिएको उक्त जग्गा बेलबारीस्थित मालपोत कार्यालयमा गएर नामसारी गरिसकिएको छ । सो जग्गा शुक्रबार आधिकारिक रूपमा पास समेत भइसकेको अध्यक्ष याखाले बताए।

यसैबीच सोमबार याखा समुदायले सो स्थानमा उभौली पूजासहित सांस्कृतिक कार्यक्रम आयोजना गर्ने कार्यक्रम समेत रहेको नगर समितिले जनाएको छ।