झापा, २५ असोज । दुर्गा प्रसाईका कार्यकर्ताले झापाको अर्जुनधारामा एमाले नेता महेश बस्नेत सहभागि कार्यक्रममा तोडफोड गरेका छन् ।
दुर्गा प्रसाईका कार्यकर्ता र पहिचानवादी पक्षधरले एमाले नेता महेश बस्नेत सहभागी कार्यक्रम बिथोल्न पार्किङमा राखेका सवारी साधन तोडफोड गरेको बताइएको छ ।
युवा संघको कार्यक्रम चलिरहेका बेला एमाले नेता कार्यकर्ताले पार्किङमा राखेका सवारी साधन तोडफोड गरिएको हो ।
बिहीबार अर्जुनधारामा राष्ट्रिय युवा संघ नेपाल अर्जुनधारा नगर कमिटीको अधिवेशन थियो । सोही कार्यक्रममा सहभागी हुन गएका नेता कार्यकर्ताको गाडी तोडफोड भएको हो ।
तोडफोडबाट सात वटा गाडीका सिसा फुटेको कोशी प्रदेशका डीआईजी राजेशनाथ बास्तोलाले जानकारी दिए ।
उनका अनुसार तोडफोडमा संलग्न पहिचानवादी र दुर्गा प्रसाईका कार्यकर्ता भएको बुझिएको छ ।
तोडफोडमा संलग्नको खोजी भएपनि पक्राउ परिनसकेको डीआइजी बास्तोलाले बताए ।