उर्लाबारी , १७ जेठ । मोरङको उर्लाबारी नगरपालिकाले स्थानीय क्रिकेट खेलाडीलाई खेल सामग्री उपलब्ध गराएको छ । बिहिबार नगर प्रमुख गंगाप्रसाद खरेलले उर्लाबारी क्रिकेट क्लबका पदाधिकारीलाई खेल सामग्री हस्तान्तरण गरेका थिए ।
क्रिकेटको माध्यमले नेपाललाई अन्तर्राष्ट्रिय स्तरमा समेत परिचित गराएको स्मरण गर्दै नगर प्रमुख खरेलले क्षमतावान खेलाडीलाई प्रशस्त अभ्यास गर्ने र खेल्ने अवसर दिन आफुहरु प्रयत्नशील रहेको बताए ।
क्रिकेट अभ्यासका लागि खेल सामग्री अभाव रहेको गुनासो आएपछि खेलाडीलाई प्रोत्साहन गर्ने हेतुले सामग्री वितरण गरिएको नगर शिक्षा तथा खेलकुद शाखा प्रमुख अशोक घिमिरेले बताए ।
खेलाडीहरुलाई ब्याट, ब्याटिङ ग्लोभ्स, थाई प्याड, लेग प्याड, किट ब्याग, हेल्मेट, बल, नेटलगायत दुई लाख मुल्य बराबरको सामग्री उपलब्ध गराइएको नगर जिन्सी शाखा प्रमुख नगेन्द्र तिम्सिनाले जानकारी दिए ।
