उर्लाबारी-३ मंगलबारेमा जारी दोस्रो वडास्तरीय भेट्रान फुटबल रनिङ कप २०८१ प्रतियोगिताको दोस्रो दिनको खेलमा वडा नम्बर २ को भेट्रान टीम विजयी ‍भएको छ ।

बुधबार भएको खेलमा वडा नम्बर २ को भेट्रानले वडा नम्बर ६ को भेट्रानलाई १-० को अन्तरले हराएको थियो । वडा नम्बर २ को जितको लागि पहिलो हाफको अतिरिक्त १ मिनेटमा जर्सी नम्बर १६ का मित्र धिमालले एक गोल गरेका थिए । आफ्नो उत्कृष्ट खेल प्रदर्शनी गरेको बताउदै आयोजकले उनलाई म्यान अफ दि म्याच घोषणा गरेको थियो ।

सो कार्यक्रमका प्रमुख अतिथी समेत रहेका उर्लाबारीका सफल युवा व्यवसायी सचिन शाक्यद्वारा उनी ट्रफीले सम्मानित भएका छन् । यस्तै सो अवसरमा ६ नम्बर भेट्रान टीमलाई आयोजकले मायाको चिनो प्रदान गर्दै सहभागिताको लागि धन्यवाद व्यक्त गरेको थियो ।

यस्तै आजको सो खेल सुरु हुनुअघि गत शनिबार आएको बाढीपहिरोको कारण अकालमै ज्यान गुमाएका यू-१४ का राष्ट्रिय खेलाडीलगायत सयौँ नेपालीहरुहरुप्रति श्रद्धाञ्जली अर्पण गर्दै एक मिनेट मौन धारण समेत गरिएको थियो ।

उर्लाबारी वडा नम्बर ३ स्थित मंगलबारे भेट्रान क्लबको आयोजनामा संचालन भएको सो प्रतियोगितामा उर्लाबारी नगरपालिकाका ९ वट‌ै वडाका भेट्रान टीमको सहभागिता रहने आयोजक क्लवका अध्यक्ष राजन सुवेदिले बताए ।

‘स्वास्थ्यका लागि खेलकुद’ भन्ने मुल नाराका साथ सो प्रतियोगिताको आयोजना गरिएको अध्यक्ष सुवेदिले बताए।

वडा नम्बर ३ सालबारीस्थित प्रस्तावित सालबारी रंगशालामा हुने सो प्रतियोगिताको विजेताले ३० हजार , उपविजेताले २० हजारसहित दुवै टिमले ट्रफी, मेडल र प्रमाणपत्र प्राप्त गर्ने आयोजकले बताएको छ ।

यस्तै प्रतियोगितामा उत्कृष्ट खेलाडी, हाई स्कोरर, वेष्ट गोल किप्पर, वेष्ट डिफेन्डर, वेष्ट कोच, म्यान अफ दी म्याचलगायतका विधाहरुमा खेलाडीलाई सम्मानित गरिने क्लवका सचिव मिलन भट्टराईले जानकारी दिए ।

उर्लाबारी नगरपालिका वडा नम्बर २ र ३ को मुख्य प्रयोजन रहने सो प्रतियोगिताको फाईनल खेल आगामी असोज २२ गते हुने आयोजकले जनाएको छ।

यसैबिच प्रतियोगिताको तेस्रो दिनको खेल बिहिबार वडा नम्बर ९ र ३ का भेट्रान टीमबिच दिउसो ३ बजेदेखी संचालन हुने खेल संयोजक विजय माझीले बताए। वडा नम्बर ९ भेट्रान टीम जारी प्रतियोगिताको डिफेन्डिङ च्याम्पियन समेत हो ।