उर्लाबारी, ११ कात्तिक। नेपाली कांग्रेस कोशी प्रदेशका सहमहामन्त्री खड्गबहादुर फागोले प्रदेश सभापति पदमा दाबी प्रस्तुत गरेका छन्।

स्थानीय तहको नेतृत्वदेखि पार्टीको क्षेत्रीय र प्रदेशस्तरका विभिन्न जिम्मेवारी सम्हालिसकेका फागोको दाबीसँगै कोशी प्रदेश कांग्रेसको भावी नेतृत्वलाई लिएर राजनीतिक चासो बढेको छ।

नेपाली कांग्रेसको वडा तहबाट राजनीति सुरु गरेका फागोले क्षेत्रीय सभापतिदेखि प्रदेश कार्यसमितिको सहमहामन्त्रीसम्मको यात्रा तय गरेका छन्। संगठन निर्माण, नेता–कार्यकर्ता परिचालन र स्थानीय सरकार सञ्चालनको अनुभवलाई आफ्नो नेतृत्वको आधारका रूपमा प्रस्तुत गर्दै उनी नेपाली काग्रेस कोशी प्रदेश सभापतिका आकांक्षी बनेका हुन्।

मोरङको उर्लाबारी नगरपालिका–५ निवासी फागोको राजनीतिक यात्रा २०४९ सालदेखि सुरु भएको हो। २०५४ मा फागो नेपाल तरुण दलको वडा-२ को सभापति, क्षेत्रीय सयोजक, जिल्ला सदस्य, जिल्ला उपसभापति हुदै १० औ महाधिवेशनमा पार्टीको वडा सह-सचिव हुदै ११ औ महाधिबेसनमा क्षेत्रीय सदस्य, क्षेत्रीय कार्यसम्पादन समिती सचिव, हुदै १२ औ र १३ औ महाधिवेशनबाट उनी नेपाली कांग्रेस मोरङ क्षेत्र नम्बर १ को क्षेत्रीय सभापतीमा सर्वसम्मत चयन हुदै दुई कार्यकाल सम्हालेका थिए।

क्षेत्रीय सभापतिको जिम्मेवारीमा रहँदा फागोले संगठन विस्तार, निर्वाचन परिचालन तथा नेता–कार्यकर्ताबीच समन्वय गर्ने भूमिका निर्वाह गरेका थिए।उनको नेतृत्वकालमा केराबारी गाउँपालिका, लेटाङ नगरपालिका र उर्लाबारी नगरपालिकामा कांग्रेसका (मेयर/अध्यक्ष ) सहित जनप्रतिनिधि निर्वाचित भएका थिए ।

१२औँ महाधिवेशनको समयमा फागो क्षेत्रीय सभापति रहँदा मोरङमा कांग्रेसको संगठनात्मक प्रभाव विस्तार गर्ने प्रयास भएको थियो। त्यही अवधिमा वर्तमान मोरङ जिल्ला सभापति डिगबहादुर लिम्बुलाई संविधानसभा निर्वाचनमा जिताउन युवा, नेता तथा कार्यकर्ता परिचालनमा फागोले महत्त्वपूर्ण भूमिका निर्वाह गरेका थिए ।

नगरप्रमुखको अनुभव पनि नेतृत्वको आधार:

पार्टी संगठनसँगै स्थानीय सरकार सञ्चालनको अनुभवसमेत फागोसँग छ। उनी २०७४ सालको स्थानीय तह निर्वाचनमा उर्लाबारी नगरपालिकाको नगरप्रमुखमा निर्वाचित भएका थिए। पाँच वर्ष नगरप्रमुखको जिम्मेवारी सम्हालेका उनले स्थानीय सरकारको नेतृत्व, प्रशासनिक कामकाज र विकास निर्माणका विषयमा अनुभव हासिल गरेका छन्।

स्थानीय तहमा जनप्रतिनिधिका रूपमा काम गरेको अनुभव र पार्टी संगठनमा विभिन्न जिम्मेवारी सम्हालेको पृष्ठभूमिलाई फागोको राजनीतिक यात्राका महत्त्वपूर्ण पक्षका रूपमा लिइन्छ। स्थानीय तहको नेतृत्व र पार्टी संगठनको अनुभवलाई प्रदेशस्तरमा उपयोग गर्ने उद्देश्यसहित उनी प्रदेश सभापतिको आकांक्षी बनेको उनका समर्थकहरूको भनाइ छ।

विशेष महाधिवेशनमा कोशीको समन्वय:

फागोको प्रदेश सभापति दाबीलाई नेपाली कांग्रेसको विशेष महाधिवेशनसँग जोडेर पनि हेरिएको छ। २०८२ पुस २७ गतेदेखि सुरु भएको विशेष महाधिवेशन पार्टीको नेतृत्व परिवर्तन र संगठनात्मक पुनर्संरचनाको बहसमा महत्त्वपूर्ण घटनाक्रम बनेको थियो।

पार्टीभित्र नेतृत्व र संगठन सञ्चालनका विषयमा असन्तुष्टि बढिरहेका बेला विशेष महाधिवेशनमा प्रतिनिधिहरूको सहभागिता र समर्थन जुटाउने प्रयास तीव्र बनेको थियो। त्यस प्रक्रियामा कोशी प्रदेशका सहमहामन्त्री फागो सक्रिय देखिएका थिए।

गगनकुमार थापाको पक्षमा समर्थन जुटाउने प्रक्रियामा फागोले निर्वाह गरेको भूमिकालाई अहिले प्रदेश नेतृत्वको सम्भावित दाबेदारीसँग जोडेर हेरिएको छ। थापा कांग्रेस सभापतिमा निर्वाचित भएपछि प्रदेश संगठनको नेतृत्व र केन्द्रसँगको समन्वयलाई लिएर थप चासो बढेको छ।पार्टीको क्षेत्रीय नेतृत्व र नगरप्रमुखको जिम्मेवारी सम्हालिसकेका फागो २०८२ सालको प्रतिनिधिसभा निर्वाचनमा पनि उम्मेदवार बनेका थिए। यसले उनको राजनीतिक यात्रा स्थानीय सरकारको नेतृत्व र संगठनात्मक जिम्मेवारीमा मात्र सीमित नरही संसदीय राजनीतिसम्म विस्तार भएको देखाउँछ। प्रतिनिधिसभा निर्वाचनको अनुभव, क्षेत्रीय संगठनमा बिताएको लामो समय र प्रदेश सहमहामन्त्रीको वर्तमान जिम्मेवारीलाई उनले प्रदेश नेतृत्वको दाबीका क्रममा आफ्नो राजनीतिक पृष्ठभूमिका रूपमा अघि सार्न सक्ने देखिन्छ।

कोशी प्रदेश कांग्रेसको नेतृत्वको चर्चा चलिरहँदा मोरङ जिल्ला सभापति एवं पूर्वमन्त्री डिगबहादुर लिम्बुको नाम पनि महत्त्वपूर्ण रूपमा जोडिएको छ। फागो र लिम्बु दुवै मोरङ क्षेत्र नम्बर १ को राजनीतिसँग सम्बन्धित नेता भएकाले उनीहरूबीचको संगठनात्मक सम्बन्ध, प्रभाव र प्रतिनिधिहरूसँगको पहुँचलाई सम्भावित नेतृत्व समीकरणमा अर्थपूर्ण रूपमा हेरिएको छ।

२०७० सालमा डिगबहादुर लिम्बु संविधानसभा सदस्य निर्वाचित हुँदा फागो मोरङ–१ को क्षेत्रीय संगठनात्मक नेतृत्वमा रहेका थिए। त्यस समयको राजनीतिक सहकार्य र संगठनात्मक सम्बन्ध पनि अहिलेको नेतृत्व चर्चामा सान्दर्भिक बनेको छ।

लिम्बुको संसदीय अनुभव, पूर्वमन्त्रीको परिचय र जिल्ला पार्टी नेतृत्वको जिम्मेवारी उनको राजनीतिक आधारका रूपमा रहेका छन्। अर्कोतर्फ, फागोको क्षेत्रीय सभापति, नगरप्रमुख र प्रदेश सहमहामन्त्रीको अनुभव उनको दाबीका आधार हुन्।

गगनकुमार थापा कांग्रेस सभापतिमा निर्वाचित भएपछि कोशी प्रदेशमा नयाँ नेतृत्व समीकरण बन्न सक्ने चर्चा सुरु भएको हो।

विशेष महाधिवेशनमा फागोले खेलेको भूमिका, क्षेत्रीय सभापतिको अनुभव, स्थानीय सरकारको नेतृत्व र कोशी प्रदेश सहमहामन्त्रीको जिम्मेवारी फागोका राजनीतिक आधार हुन्।

राजनीतिशास्त्रमा स्नातक तथा ग्रामीण विकासमा स्नातकोत्तर तहको अध्ययन पूरा गरेका फागोको नाम प्रदेश सभापतिका लागि चर्चामा आउनु र औपचारिक रूपमा उम्मेदवारी घोषणा गर्नु फरक विषय हुन्। उनको दाबीलाई आगामी नेतृत्व चयनको सम्भावित राजनीतिक घटनाक्रमका रूपमा बुझ्न सकिन्छ। अन्तिम समीकरण भने अन्य आकांक्षीको सक्रियता, औपचारिक दाबेदारी, प्रतिनिधिहरूको समर्थन र पार्टीभित्र हुने सहमतिपछि स्पष्ट हुनेछ।

जनप्रतिनिधीको भुमिका देखि नेपाली कांग्रेस कोशी प्रदेशको सहमहामन्त्रीसम्मको जिम्मेवारी सम्हालेका फागोका लागि प्रदेश सभापतिको दाबी राजनीतिक यात्राको अर्को महत्त्वपूर्ण चरण बनेको छ।