उर्लाबारी । उर्लाबारी उद्योग वाणिज्य संघको ३४ औँ साधारणसभा सम्पन्न भएको छ । शनिवार संघको सभाहलमा समपन्न कार्यक्रममा उर्लाबारीको प्राइम एफ.एम. मा कार्यरत पत्रकार सुमन घिमिरे सम्मानित भएका छन् ।
नेपाल उद्योग वाणिज्य महासंघका उपाध्यक्ष रामचन्द्र संघाईको प्रमुख आतिथ्यतामा सम्पन्न कार्यक्रममा पत्रकार घिमिरे सहित उर्लाबारीका व्यवसायी पनि सम्मानित भएका थिए ।
कार्यक्रममा महासंघका निवर्तमान उपाध्यक्ष किशोर प्रधान, मोरङ १ का प्रतिनिधिसभा सांसद् घनश्याम खतिवडा, प्रदेश सांसद् कुशल साम्बा, इटहरी उद्योग वाणिज्य संघका अध्यक्ष भीम पौडेल, संघका प्रमुख सल्लाहकार प्रितम खड्गीलगायतले शुभकामना मन्तव्य राखेका थिए ।
सो अवसरमा संघका अध्यक्ष शेरबहादुर भण्डारीले संघले एक वर्षको अवधिमा गरेका गतिविधि र भावी कार्यक्रम समेटिएको प्रगति प्रतिवेदन प्रस्तुत गरेका थिए भने लेखा समिति संयोजक गणेश खत्रीले लेखा समितिको प्रतिवेदन प्रस्तुत गरेका थिए ।